و رحت مرجان

لمرجان أحمد مرجان رحت الفيلم ياولاد وكان لطيف الحقيقة جدا بيتكلم عن المتناقضات اللى عندنا فى مصر و الرشاوى و الحاجات دى فيلم حلو آه لكن كنت فبل ما اروح الفيلم ده سمعت آراء بعض الناس الذين شاهدوا الفيلم, لكن من كلامهم حسيت بقى ان الفيلم اييييييييييييييييه فظيع و مفيش لقطة ما بتقولش حاجة أو على حد تعبير أحد الناس(كل مشهد بيضحك)

حلو آه لكن مش للدرجة دى

كمان اكتشفت حاجة بقى وهى ان الناس جاية الفيلم متسستمة-جاية من سيستم بالأنجليزى-على انهم هيضحكوا।والله ا جماعة ولا ليكوا عليا يمين ان فى واحد كان فى السينما أول ما عادل امام ظهر راح مصفق!!
-آه والله كدة مع نفسه , وطبعا ما شاء الله طول الفيلم ما دام عادل بيتكلم هو عم يضحك^^
حتى لو امام بيقول حاجات عادية يعنى بس برضوا عاجباه أوى,طيب يا سيدى ربنا يبسطك
اما اللى بسطنى وعجبنى فى الفيلم بقى كان كام حاجة كدة
أولا: ما تتصوروش انا فرحت قد ايه لما لقيتهم جايبين حبيبى حسن مصطفى ضيف شرف
أصل انا بحب الراجل ده أوى و كان نفسى انه يشتغل لأن هو يا حبيبى كان نفسه أوى يشتغل وبيشكى ان ما حدش بياخده معاه فى أى فيلم وادوار الأب أو العم محتكرها نجمين ثلاثة و خلاص
فالحمد لله انه عمل حاجة
ثانيا:عجبنى أوى أحمد السعدنى يا خراشييييييييييييييييييييييي,كان زى العسل وعامل دوره كويسجدا اللى هو الطالب اللى متشدد-أخوان مسلمين يعنى-والكلام بقى بتاعهم و الأسرة والأخ فلان و الأخت علانة والكلام ده।
كان حلو أوى والله
ثالثا:الولد أبو شعر ده-للأسف مش عارفة اسمه-كان سكر سكر سكر
رابعا:الممثل العسووووووووووووول-اللى برضو للاسف مش فاكرة اسمه الحقيقى-بس هو معروف أوى اللى هو بيعمل اعلانات الضرائب ده كان دوره رائع جدا جدا جدااااااااااا
بس الفيلم جميل والله
الفيلم بقى اللى نفسى أشوفه هوpirates of the carebian3
فادعو بقى انو ما يكونش اتشال

الغوغاء أمثالنا

فى الآونة الأخيرة(أى ال50سنة اللى فاتو)الأصل فينا كعرب عموما و كمصريين خصوصا أصبح الفوضى و الهرجلة।
ومحناش زى البنى آدمين التانيين كدة نتحرك بنظام ونتكلم بالدور ।
ولاحظت الآن ان القاعدة أصبحت الاخلال بالقاعدة أو النظام,ما تلاقيش أبدا حد بيعدى الشارع عند خطوط عبور المشاه الا لو كان بالصدفة ,ولا تلاقى أبدا حد ينزل من الأتوبيس فى محطاطه الا لازم ينزل على ناصية الشارع لحسن البعيد مشلول بقى।
ولا المترو,يا لاهووووووووووووووووووووووووووووى دا كلو كوم و المترو دا كوم تانى خالص।
دا ييجى المترو من هنا و تلاقى الهجوم الكاسح سواء اللى عاوز ينزل نزل ولا ما نزلش كله بيزق كله ومفيش حد ملتزم بالصعود من أبواب الصعود و النزولمن أبواب النزول।
دا الواحد بيبقى فى تنص هدومه لو حد من المدرسين الكوريين جابه حظه التعيس و ركب المترو وشاف الأهوال والفظائع دى
ولا من جوا بقى ,عاديك عن الروائح الفواحة من الركاب و خصوصا فى الصيف بقى مش ممكن।
مرة كان معايا بنت من ليبيا وكانت عاوزة تروح جامعة عين شمس لأنها بتعمل دكتوراه و عاوزة تروح مكتبة الجامعة وأنا بغبائى ركبتها المترو و ما كان من البنت الغلبانة الا انها فرفرتمن تانى محطةو فرهدت و بطنها قلبت ووشها أصفر و قالتلى (يعنى ما مكتر الله فىمصر الا فىالصابون و الميه ليش المصريين ما يحبون يتحمموا؟)
طبعا الواحد كان فى نص هدومه انا مش قادرة اقول لها حاجة انا لو كنت مكانها كنت قعدت أشتم لحد ما لسانى يقع على شرط بقى دى كانت راكبة المترو الصبح يعنى الناس ما لحقتش تعبأ يعنى।
المهم الكلام خدنا عن المترو ونسيت أحكى عن السبب وراء كتابتى هذا البوست
أصلى امبارح كنت قاعدةفى النادى أقرأ كتاب لا بيا ولا عليا و لقيت اللى جاية تميل عليا و تقول فى صالون ثقافى هيبدأ الآن لو تحبى تحضرى أتفضلى
قلت و ماله نحضر و عرفت انهم هيتكلمو عن كتاب مجمع لناس كتيرة كدة و جايبين २ نقاد وكدة
المهم قعدنا وطبعا القعدة على الضيق جدا فى قاعة مكيفة فى النادى كدة وباقى الناس قاعدة حوالينا واللى بيضحك و اللى بيتكلم براحته و عادى جدا ومفيش معانا ميكروفون و لا حاجة
قلت معلش يمكن بخل من ادارة النادى و لا تقصير فى الاعداد ولا اى حاجة
الصالون بدأ بقى والهبل كله بدأ معاه تلاقى الموبايلات ترن و الأغانى بقى و مفيش حمية كدة ان البنى لآدم يرد بسرعة ولا يكانسل لا لازم نسمع أول كوبليهين من الأغنية اللى محطوطة رنة لا ويردو عاااااادى।
والحلاوة بقى ان ثلاثة أرباع الكتاب مكانوش حاضرين -أصلا الكتاب عبارة عن بعض الأشعار العامية و الفصحة و القصص القصيرة والدراسات الأدبية-لا وبعد ساعة من البداية لقيت ناس بادئة تيجى!!
لا و كمان الاقى اللى جاية تسلم و تبوس على طنطن اللى بتدير الحوار وطنط عادى بتسلم و لا كأنها معطلة حاجة خالص,وبعدين جه الراجل بتاع الكافيتريا يشوف الضيوف هتشرب ايه و طبعا قاطع الناس و الكل بقى قعد يطلب
بعد شوية الجرسون رجع و راح هبد المشاريب على ترابيزة و قال ابقو وزعوها انتو
طبعا راحت طنط منظمة القعدة دى برأت له و قالت لا انت وزع و بدأت الحفلة الراجل يقول مين فيروز؟ما يردوش
مين نسكافيه؟ يرد واحد على استحياء كدة آااه।
راح الواد اتخنق و مشى راح قام ३ من الناس عشان ياخدو حاجاتهم وواحد راح موقع كباية المانجو _ييييييييييييييييييييييييييه_ ايه الهباب ده؟
دا صالون أدبى ولا أى حاجة بالله عليكم؟(ولا بلاش بالله عليكم دى لحس بتفكرنى بناس كدة!!)
ولا الأتنين النقاد بقى واحد يتكلم و التانى يا أستاذ أقوم انا امشى ولا ايه؟ هو انا مش هتكلم؟
و هبل فى هبل
رحت قلت لنفسى دحنا لسة بدرى علينا أااااااااااااااااوى!!

هتتبااااااااااس يعنى هتتبااااااااااااااس

من زمان وأنا بفكر فى موضوع البوس ده ,قصدى طبعا البوس البرىء اللى بين الأصحاب والأقارب وكدة الولاد للولاد والبنات للبنات
أصل ليه يعنى لازم كل ما نشوف حد ولا نقابل حد نبوس بوستين أو 3 ودلوقتى كمان بيقولك السنة 4
يا لهوووووووووى دى فعلا حاجة غريبة أوى
أنا أصلا طبيعتى زى حريص اللى فى فلاش-فاكرينه؟-من النوع اللى بيخاف على صحته بالجامد بس بحب الناس والله لكن أنا بتعب نفسيا من الحكاية دى والله وساعات كتير بجمع اللى هيتباسوا ورا بعض كدة وبعد ما أخلص بغسل وجهى ان أمكن ولو ما نفعش بمسح بمنديل مبللل ,آه والله العظيم
بس فكرت كدة مع نفسى وعلى ايه الغلب دا كله؟ وايه يعنى البوس ده دا أضراره أكتر من منافعه فمثلا:
أولا بيجيب أمراض وأنا سمعت دكتور بيقول أن عدد الأمرض التى يمكن أن ينقلها البوس 15_أى والله العظيم_منها البرد و الأنفلونزا والجديرى والحصبة بعيدا عن السامعين

ثانيا بيضيع وقت آه والله ياما ناس بتقف تسلموتبوس على سلم المترو مثلا ولا سلم جامعة أو مدرسة ويعطلوا الدنيا و خصوصا البنات بصراحة

ثالثا فى الأفراح مثلا العروسة والعريس بيبقى وشهم مزنهر من كتر البوس اللى بيتباسوه من المعازيم -لما ييجو و وهم مروحين-لازم

اللى حمسنى أكتر بقى وخلانى أكتب عن الموضوع ده أنى عرفت من برنامج وسطالبلد -بغض النظر عن غتاتة المذيعة-أن فى جمعية أهلية أسمها جمعية منع القبلات-هاهاها طبعا الاسم مسخرة بس الموضوع جد والله وهدفهم التوعية بخطر البوس و كدة وقالو حكاية ال15 مرض

النكتة بقى لما استعرضوا تقرير عن رأى الناس عن البوس وكدة,طبعا سيبكو من الناس الهبلة اللى بتقول كلام أهبل أساس ايعنى واحد مثلا يقولك التواضعععععععععع أيوا مال التوضع بالقصة يعنى؟وواحد تانى يقول البوس ده حاجة غريبة عن المصريين ومش عارف جات لنا من مين الصراحة
معرفش انا الحج ده مع مين أصلا
باقى الناس بقى بتقول لا البوس دهحاجة مهمة و لو ما بوستش صاحبى ولا قريبى ممكن كدة أزعله ولو هو ما باسنيش أنا هزعل و بعدين الناس بتبوس اللىتعرفهم وبيبقو متأكدين من نظافتهم يعنى
يعنى الشارع المصرى قال كلمته,قال ايه بقى؟


هتتبااااس يعنى هتتباااااااااااااااااااس

امتى بقى؟

حقيقى أنا اتخنقت من المجتمع الذكورى اللى عايشين فيه ده
كل حاجة ليهم هما أوكيه وماله انما احنا لا و ألف لا.
وحتى لو حاجة عادية زى مرواح فى حتة ولا اشتراك نادى صيفى ولا نشاط "يبقى لازم تاخدى أخوكى معاكى حتى لو أخويا ده عيل صغير ولا حتى لو كبير عنى هو كان هيمنع عنى ايه؟ ما اللى بيقول كلمة بيقولها و يجرى ولا اللى بيتحرش باللمس حتى قال يعنى غصب عنه و مش واخد باله واحنا مش هنعمل بقى فضايح و مشاكل فى الشارع و خصوصا لو اللى عاكس ده من الصيع اللى بيبقو مرميين فى الشوارع كدة.
طب لما هى هى ليه لازم كل واحدة تمشى بغفير معاها فى الشارع؟ وتبقى تحت رحمته اشى غيرى اللبس ده و اشى انا ماليش مزاج انزل النهاردة و و و
وغير كل ده لو الواحدة نازلة لوحدها من غير حراسة يبقى لازم كل 4 كيلو متر ترن مرة على بابا و مرة على ماما ويا ريت كمان بلاش نزول الا للضرورة يعنى نروح الكلية و لا الجامعة و خلاص وكمان اليوم اللى فيه حاجات مقدور عليها يبقى نقعد فى البيت أحسن "بدل المرمطة والبهدلة"
انا ما انكرش ان النزول عذاب وقرف بس البنى آدم برضو ليه احتياجاته الاجتماعية
مجتمع يقرف.

اللى فات ده ممكن يكون حاجات بسيطة و مش ضرورية لكن بصو اللى جاية دى بقى يا حضرات:

انتو فاكرين فيلم بين القصرين لما سى السيد يقعد ياكل الأول مع ولاده الصبيان ولما يخلصوا البنات تيجى تاكل مع مامتهم؟
أهو دا االى حصل تقريبا واحنا فى القرن ال21

رحت الشرقية أزور أقاربنا
طبعا الرجالة قاعدين لوحدهم و الستات لوحدهم أقوم ألاقى قريبتنا بتصب البيبسى للرجالة الأول والستات تاخد الفضلة يطلع بق بقى ولا ما يطلعش أساسا مش فارقة المهم البهوات ياخدو الأول
ليه يعنى ان شاء الله؟
وياما فى الجراب يا حاوى

كلمة أخيرة للرجالة:

بكرهكم بكرهكم

تيست تيست,2,4,6

لولولولولولولى
أخيرا عملتها,عملت مدونة.ياهووووووووووووووووو.

احم...عجبانى أوى حكاية التدوين دى. والله أنا حاسة انها هتبقى فتحة خير بالصلاتو على النبى

الهى ربنا يجعل لى فى كل بوست سلامة ويكفينى شر المخبى قادر يا كريم قولو آميييييييييين

يا رب